Heimatilbúnir kjúklinganaggar og sterk afrísk tómatsósa

Eftir
Þetta er einn af mínum uppáhalds réttum! Það tekur svolítinn tíma að búa hann til en tíminn er alveg þess virði fyrir svo gómsætan endi. Sósan er mjög svipuð því sem ég nota í Jollof hrísgrjónaréttinn minn (sjá hér) og ég endurtek að fara varlega í piparinn og líka að nota hreina tómata í dós í sósuna (ekki með lauk eða kryddi). Venjulega er kjúklingnum blandað saman við sósuna og úr verður kjúklingakássa en það eru ekki allir jafnhrifnir af sterkri sósu og ég get lofað því að allir krakkar munu elska kjúklinganaggana!

 Kjúklinganaggar
4 kjúklingabringur
2-3 hvítlauksrif
1 þumall ferskt engifer
1 dl hveiti
1 tsk. kjúklingakrydd
1 tsk. chiliduft
1/2 tsk. aromat
1 kjúklingateningur
salt & pipar
matarolía

 Skerið kjúklingabringurnar í litla bita. Setjið smá olíu í pott og setjið kjúklinginn í pottinn. Rífið bæði engiferið og hvítlaukinn yfir og blandið vel saman. Setjið lok á pottinn og steikið í 3-5 mínútur, þar til kjúklingurinn er orðinn hvítur allann hringinn (hann á ekki að vera fulleldaður). Setjið sigti ofan á skál og hellið kjúklingnum yfir. Við viljum fá allt soðið í skálina undir. 
Setjið olíu í pott (um 1-2 dl) og kveikið undir á miðlungshita. Matarolía getur verið dýr og ég ætla að benda ykkur á það að það er í góðu lagi að nota hana aftur! Passið bara að láta hana kólna aðeins fyrst áður en þið hellið henni, sérstaklega ef þið viljið geyma hana í plastíláti því heit olía bræðir plast auðveldlega. 
Setjið hveiti og krydd saman í lokanlegt box og hrisstið þar til allt hefur blandast vel saman. Það er um að gera að leika sér með kryddin og bæta og breyta eftir smekk. (Ef þið eigið ekki box er líka hægt að nota glæran plastpoka, fylla af lofti og hrissta, þá er líka minna uppvask ;) ) Setjið kjúklingabitana, um 5-10 í einu ofan í boxið, lokið og hrisstið þar til bitarnir eru þaktir í kryddhjúpnum. 
Þegar olían er orðin heit ætti að krauma aðeins í henni og þegar biti er settur ofan í ætti að "bubbla" í kringum hann. Notið stóran gaffal eða skeið til að setja kjúklinginn varlega ofan í olíuna (athugið að nota ekki plast eða tréáhöld! það getur bráðnað og/eða brunnið). Setjið nokkra kjúklingabita í einu og veltið um í olíunni í um 3 mínútur eða þar til þeir eru orðnir fallega gylltir allann hringinn. Takið upp úr og setjið á eldhúspappír og endurtakið þar til allur kjúklingurinn er eldaður.  

 Sterk afrísk tómatsósa:
1 laukur
3 hvítlauksgeirar
um 1/2 þumall ferskt engifer
dós niðursoðnir tómatar (hreinir)
1/3 til hálfur habanero pipar
2 msk matarolía
kjúklingasoð
salt & pipar

 Setjið lauk, hvítlauk, engifer, habanero pipar og niðursoðna tóamta í matvinnsluvél þar til úr verður mauk. Setjið olíu í stóran pott og hellið tómatmaukinu út í og mallið á miðlungshita með lokið á. Þegar þið hafið fengið soðið af kjúklingnum hellið því saman við sósuna og látið malla í um 1 klukkustund með lokið á, hrærið af og til. Þá má smakka sósuna til með salti & pipar.

Þennann er gott að bera fram með hrísgrjónum og fersku salati. Á myndinni eru líka steiktir plantain-bananar sem eru vinsælir meðal afríkuþjóða og í S-Ameríku, um að gera að prófa! Þeir fást í Hagkaup og mögulega öðrum matvöruverslunum :) 
Verði ykkur að góðu!


Ummæli

Skrifa ummæli

Vinsælar færslur af þessu bloggi

Klassískar Íslenskar Pönnukökur og Súkkulaðilummur

Eftir
Mynd
Í þessu veðri er best að vera bara inni í kósýheitum og baka eitthvað gott með kaffinu. Í dag skellti ég í pönnukökur. Hérna ætla ég að deila með ykkur uppskrift af klassískum íslenskum pönnukökum og læt líka fylgja með uppskrift af súkkulaðilummum sem ég prófaði um daginn og voru ótrúlega góðar! Pönnukökur 3 dl hveiti 6 dl mjólk 1/2 tsk salt 3 egg 40 gr. brætt smjör 1 tsk vanilludropar Ég held að algengasta vesenið við að búa til pönnukökur er þegar þær fara að festast við pönnuna. Það sem ég hef gert er að bræða smjörið á pönnukökupönnunni og hella því svo af í deigskálina. Blandið öllu saman í stóra skál en hellið aðeins helmingnum af mjólkinni til að byrja með, þegar þið hafið hrært öllu vel saman er seinni helmingnum bætt út í. Hafið pönnukökupönnuna heita áður en þið byrjið, á meðalháum hita, ef þær byrja að brenna of hratt lækkið þá hitann aðeins. Hellið þunnu lagi af deigi á pönnuna og veltið henni svo deigið hylji hana. Gætið þess að setja ekki of mikið deig þar sem ...
Lesa meira

Afrísk Jollof hrísgrjón með kjúklingi

Eftir
Mynd
Fyrir nokkru síðan fékk ég áhuga á afrískri matargerð. Kærastinn minn er frá Ghana og þegar við fórum að búa saman langaði mig að innleiða uppskriftir úr hans heimalandi inn í okkar vanalega matar-plan. Ég er líka svo heppin að eiga góða nágrannakonu frá Ghana sem er frábær kokkur og hún hefur komið mér svolítið af stað. Ghanamenn (og konur) elda mikið sterkan mat og nota mikið þennan piparávöxt. Þetta er afrískur Habanero pipar og ég hef fengið mína í Hagkaup í litlum pokum. Þeir eru rosalega sterkir og ég nota yfirleitt ekki meira en hálfan pipar þegar ég elda með þá. Ef þið eruð hrifin af sterkum mat er hægt að setja örlítið meira en ég mæli með að þið prófið ykkur hægt áfram. Þá má frysta svo þeir endist lengur. Fyrst þegar ég eldaði með þennan pipar lenti ég í því að fá svolítið sem kallast "Hot Pepper Hands", en það er svakaleg bruna- og sviðatilfinning í höndinni, sérstaklega á handabakinu, sem fer ekki þó hendurnar séu þvegnar með sápu heldur þarf að láta þær li...
Lesa meira

Súkkulaði skúffukaka

Eftir
Mynd
Þessi kaka var mjög vinsæl á mínu heimili þegar ég var yngri og var oft bökuð með sunnudagskaffinu eða við önnur tilfefni. Ég hef því borðað og bakað hana ótal mörgum sinnum og ég er á þeirri skoðun að hún sé bara einfaldlega sú besta. Uppskriftin er einföld. Þurrefnin eru mæld í bollum en ekki grömmum eða desilítrum, en ég hef bara notað miðlungsstóran bolla eða svolítið kúfað desilítramál. Það er súrmjólk í uppskriftinni sem veldur því að kakan verður dúnmjúk og nánast bráðnar í munninum. Ég hef oftast notað bara AB mjólk í staðin fyrir súrmjólk, það skiptir ekki öllu máli svo lengi sem það er "hreint", þ.e. ekki bragðbætt. Uppskriftin hljóðar svona:  3 egg 2 bollar sykur 200 gr. smjörlíki (mjúkt) 4 bollar hveiti 1 tsk. lyftiduft 2 tsk. natron/matarsódi 3-4 msk. bökunar-kakó 1 tsk. vanilludropar 2 bollar súrmjólk/AB mjólk eða hreint jógúrt Hitið ofninn í 180ºC. Egg og sykur þeytt vel saman, smjörlíkinu bætt við og svo er rest bætt út í og hrært þar til allt hefu...
Lesa meira