Afrísk Jollof hrísgrjón með kjúklingi

Eftir



Fyrir nokkru síðan fékk ég áhuga á afrískri matargerð. Kærastinn minn er frá Ghana og þegar við fórum að búa saman langaði mig að innleiða uppskriftir úr hans heimalandi inn í okkar vanalega matar-plan. Ég er líka svo heppin að eiga góða nágrannakonu frá Ghana sem er frábær kokkur og hún hefur komið mér svolítið af stað. Ghanamenn (og konur) elda mikið sterkan mat og nota mikið þennan piparávöxt. Þetta er afrískur Habanero pipar og ég hef fengið mína í Hagkaup í litlum pokum. Þeir eru rosalega sterkir og ég nota yfirleitt ekki meira en hálfan pipar þegar ég elda með þá. Ef þið eruð hrifin af sterkum mat er hægt að setja örlítið meira en ég mæli með að þið prófið ykkur hægt áfram. Þá má frysta svo þeir endist lengur. Fyrst þegar ég eldaði með þennan pipar lenti ég í því að fá svolítið sem kallast "Hot Pepper Hands", en það er svakaleg bruna- og sviðatilfinning í höndinni, sérstaklega á handabakinu, sem fer ekki þó hendurnar séu þvegnar með sápu heldur þarf að láta þær liggja í alkahóli. Þetta gerðist því ég skar piparinn í höndum, núna set ég hann alltaf í blandara. Passið ykkur á þessu! Ef þið leggið ekki í Habanero piparinn má sjálfsagt nota aðrar mildari tegundir af pipar, t.d. chili. 

 Í þessa uppskrift þarf:
4 kjúklingabringur
3 msk. matarolía
1 stór laukur
3 tsk. tómatmauk
1 kjúklingateningur
400 gr. basmati hrísgrjón 
1 rauð paprika
1 gul paprika
2 hvítlauksgeirar
1 dós (hreinir) niðursoðnir tómatar 
Þumall af fersku engiferi
1/2 Habanero pipar

 Flestir niðursoðnir tómatar í dós eru með einhverju kryddi eða lauk en í þessa uppskrift viljum við fá hreina niðursoðna tómata, fínt að nota bara Euroshopper.
Þar sem ég ákvað í gærkvöldi að búa þetta til í hvelli átti ég hvorki til papriku né basmati hrísgrjón. Ég notaði í staðin frosið grænmeti og Uncle Bens whole grain brún hrísgrjón, þau drekka minni vökva í sig en basmati hrísgrjónin svo ef þið viljið notast við þau þarf að setja meira, eða um 450-500 gr. Hrísgrjónin eiga að drekka í sig allann vökva í pottinum. Þessi uppskrift er fyrir um 4 (svanga) manns en það er hægt að minnka hana eða geyma bara afgangana, það er ekkert verra. 

 Svona fariði að:
Kryddið kjúklinginn með salti og pipar. Ég bætti líka við kjúklingakryddi og chili. Hitið 2 msk af olíu í stórum potti og steikið í cirka 5 mínútur þar til kjúklingurinn er orðinn gylltur allann hringinn (hann á ekki að vera fulleldaður). Takið kjúklinginn af pönnunni og setjið til hliðar (geymið soðið, ekki hella því). Skerið lauk gróft og setjið aðra msk. af olíu í pottinn og steikið þar til hann er orðinn mjúkur. Setjið hvítlauk, niðursoðna tómata, engifer og pipar í matvinnsluvél. Setjið tómatmauk saman við laukinn í pottinum og steikið í 2 mínútur og setjið svo piparmixið saman við. Myljið kjúklingatenginginn út í og hrærið. Bætið út í pottinn 600 ml. af sjóðandi vatni ásamt kjúklingnum. Látið malla í 15 mínútur. Setjið hrísgrjónin í skál (eða sigti) og hreinsið með köldu vatni þar til vatnið er tært. Bætið hrísgrjónunum þá út í pottinn ásamt papriku og/eða frosnu grænmeti og lækkið hitann, setjið álpappír yfir pottinn og svo lok (svo engin gufa komist út) og látið malla í 20-30 mínútur eða þar til hrísgrjónin hafa dregið í sig allann vökva í pottinum. Takið af hellunni og blandið öllu vel saman.

Verði ykkur að góðu! :)

Ummæli

Skrifa ummæli

Vinsælar færslur af þessu bloggi

Klassískar Íslenskar Pönnukökur og Súkkulaðilummur

Eftir
Mynd
Í þessu veðri er best að vera bara inni í kósýheitum og baka eitthvað gott með kaffinu. Í dag skellti ég í pönnukökur. Hérna ætla ég að deila með ykkur uppskrift af klassískum íslenskum pönnukökum og læt líka fylgja með uppskrift af súkkulaðilummum sem ég prófaði um daginn og voru ótrúlega góðar! Pönnukökur 3 dl hveiti 6 dl mjólk 1/2 tsk salt 3 egg 40 gr. brætt smjör 1 tsk vanilludropar Ég held að algengasta vesenið við að búa til pönnukökur er þegar þær fara að festast við pönnuna. Það sem ég hef gert er að bræða smjörið á pönnukökupönnunni og hella því svo af í deigskálina. Blandið öllu saman í stóra skál en hellið aðeins helmingnum af mjólkinni til að byrja með, þegar þið hafið hrært öllu vel saman er seinni helmingnum bætt út í. Hafið pönnukökupönnuna heita áður en þið byrjið, á meðalháum hita, ef þær byrja að brenna of hratt lækkið þá hitann aðeins. Hellið þunnu lagi af deigi á pönnuna og veltið henni svo deigið hylji hana. Gætið þess að setja ekki of mikið deig þar sem ...
Lesa meira

Súkkulaði skúffukaka

Eftir
Mynd
Þessi kaka var mjög vinsæl á mínu heimili þegar ég var yngri og var oft bökuð með sunnudagskaffinu eða við önnur tilfefni. Ég hef því borðað og bakað hana ótal mörgum sinnum og ég er á þeirri skoðun að hún sé bara einfaldlega sú besta. Uppskriftin er einföld. Þurrefnin eru mæld í bollum en ekki grömmum eða desilítrum, en ég hef bara notað miðlungsstóran bolla eða svolítið kúfað desilítramál. Það er súrmjólk í uppskriftinni sem veldur því að kakan verður dúnmjúk og nánast bráðnar í munninum. Ég hef oftast notað bara AB mjólk í staðin fyrir súrmjólk, það skiptir ekki öllu máli svo lengi sem það er "hreint", þ.e. ekki bragðbætt. Uppskriftin hljóðar svona:  3 egg 2 bollar sykur 200 gr. smjörlíki (mjúkt) 4 bollar hveiti 1 tsk. lyftiduft 2 tsk. natron/matarsódi 3-4 msk. bökunar-kakó 1 tsk. vanilludropar 2 bollar súrmjólk/AB mjólk eða hreint jógúrt Hitið ofninn í 180ºC. Egg og sykur þeytt vel saman, smjörlíkinu bætt við og svo er rest bætt út í og hrært þar til allt hefu...
Lesa meira